Jamita Jumat Agung

Pesta Parningotan Hamamate Ni Tuhan Jesus

Tgl. 25 Maret 2016

Nats : Johannes 19 : 28-30

---

KRISTUS DO PARDENGGANANTA

I.   Patujolo

Mangihuthon portibi on, “Haotoon do Silang i di roha ni halak na naeng mago, alai basa-basa ni Debata do i di hita na dapotan haluaon” (1 Korint 1: 23 – 24). Adong do makna ni Silang ni Kristus i na ingkon sihangoluhononta, ai disi ma dipapatar Jesus asi ni rohaNa tu jolma pardosa. Dipatuduhon do keberpihakanNa tu hajolmaon. Dipapatar holong ni rohaNa tu hita jolma pardosa, laos patar ma hajolmaon ni Jesus, songon sada jolma na olo: Mauas, male jala dihianati jolma.

Barita Nauli taringot tu Jesus na diparsilanghon, dibaritahon angka na opat Evangelium di Padan na Imbaru do i, ndang pola adong perbedaan ni Evangelium na berarti asing ni variasina, lao patoranghon lapatan dohot tujuan panurathonon i do. Sude do nasida manghatingdanghon jala pasintonghon, na tutu do peristiwa Jesus na tarpajal i, Asa saluhut angka na manjaha barita i porsea tu Debata. Hamamate ni Jesus Kristus ido na mamboan haluaon dohot pardengganan, nang ngolu di angka jolma pardosa. Nangpe di angka ugamo/haporseaon na asing, mamperdebathon: "Dia ma mungkin Debata boi diparsilanghon ?" Alai di hita halak Kristen, sada jala hot do haporseaonnta na mandok: Jesus tereksekusi mati ala ni dosanta do, songon na binaritahon ni opat Evangelium di Padan na imbaru i.

II.     Hatorangan

Ayat 28-30 : Saat-saat terakhir di hau pinorsilang i sian ngolu ni Jesus di portibi on, boi do tabereng marhite dua hal, ima :

Naparjolo ima na berhubungan tu panghilalaan ni hajolmaonNa, na mandok "Mauas Ahu" (Psalm. 69:21) . Na marlapatan ma on, boi do mauas secara alamiah, mangido aek siinumon laho pasombu uasna, ala naung suda gogoNa na manuhuk silang i, natape disingkat si Simon na sian Kirene i Ibana laho manuhuk silang i sian pantaran ni habangsa ni si Latus sahat tu dolok Golgata. Nunga hira na habis hir ni hodokNa, nunga hira mansohot hoihoi halojaonNa jala lam redep orongorong hinahansit ni sitaononNa. Gabe hira na mangulon ma idaon Jesus di silang i manaon angka na hansit i.  Hape lam gale do pamatangNa ala na so tartaonNa be sitaonon i. tongon dipanghilalaan na songon i ma tarbege soara ni Jesus na mandok “Mauas Ahu!”. Molo didok Jesus jala disoarahon “Mauas Ahu!”,  ndada na mangido aek siinumon sambing Ibana disi. Lapatan na umbagas di hata pandohan i, i ma: nunga ringkot ombas paulak hosa loja, nunga ringkot mansadi sitaonon na hansit, jala nunga ringkot mansohot sitaonon i.

Taparrohahon ma muse di ayat 29, pamingkirion ni angka natorop tarlumobi ma soldadu i, umbege pangidoan ni Jesus i, idaon songon na burju do nasida manarihon Jesus jala humalaput do nasida mambuat aek siinumon ni Jesus, hape sasintongna, ndada aek siinumon na dilehon nasida tu Jesus: Tuak na asom (asam/cuka) do na dilehon marhite na mambornohi limut na dibaen di ujung ni tolong (hisop =  na umpuna tangkai na langsing) (bdn. Mrk. 15:36). Sangkap nasida tontu asa bulus do mago panghilalaan ni Jesus. Ai na mangagohon panghilalaan na hansit do tuak na asom i.

Napaduahon na berhubungan tu panimpuli ni ulaonNa, dipandohanNa "Nunga Marujung".

Dung sun Ibana manginum tuak na asom i, didok Ibana ma “Nunga Marujung". Nunga sidung be dibolus angka na hansit i. Nunga saluhut diae jala ditaon Jesus angka na bernit i. Dungi dipaunduk ma uluna, pasahathon tondina, jala tos ma hosana. Molo tabereng di evangelium Lukas tangkas do didok: "Dungi Marsoara na gogo ma Jesus, di dokma: Amang, Tu bagasan tanganMu ma hupasahat tondingku!", dungi tos ma hosana (Luk. 23:46). Tangkas ma taboto sian on, misi ni Jesus nunga sae, Lomo ni roha ni AmaNa dilaksanahon saluhutna, Huaso ni dosa nunga salpu, Haluaon na binoanNa nunga sae marhite hamamatena asa tartobus saluhut dosa ni jolma. Ai marhite silang i do, tanda holong ni roha ni Debata dohot panghophopon ni Debata marhite Jesus Kristus tu jolma pardosa i. Didok Marthin Luther do dihatoranganna taringot tu theologiae crusis: arga do panobusion ni Debata na pinatupaNa marhite Jesus Kristus. Ai pola ingkon mate tarpajal Ibana di silang i. Asa sitaonon ni Jesus di silangi do patuduhon hinaarga ni panghophopionNa i, huhut paboahon na so adong haluaon so ala ni hamamate ni Jesus Kristus di silang i.

III.   Panimpuli

Silang (yun: σταυρός) ima dalan na diporsan Jesus asa dapotan haluan saluhut jolma. Didalani Jesus do silang i dohot ias nang bulus ni rohaNa. Nangpe, dihilala rohaNa do sada haporluon naso tu Ibana do i, alai hasasaut ni lomo ni roha ni AmaNa do. Alai sadar do Ibana di ulaonNa di tingki na tarpajal i Ibana jala dituhuk Ibana do i saluhutna. Jesus na tereksekusi i, simbol hasesaan ni dosanta do. HamamateNa di hau pinorsilang i, ima sahali untuk selamana. Laos hamamateNa i do gabe patujolo ni haluaon jala simbol harajaon ni Debata. Harajaon i, ima: Parsadaan ni angka jolma naung tinobus ni Jesus marhite mudarNa na durus di silang i. Alani i, di Jumat Agung dinamamestahon parningotan hamamate ni Tuhan Jesus i hita, tatanda ma hadirionta diadopan ni Debata, dohot tongtong ma taingot jala taulahon, songon pandohan ni Apostel Paulus: "Ai arga do hamu ditobus: Dibahen i pasangap hamu ma Debata marhitehite dagingmuna dohot marhitehite tondimuna, ai Debata do nampuna i" (I Korint. 6:20). Amen

               Hally Halfikal Nababan, STh

HKBP SIRUAR RESSORT PANGOMBUSAN